有一日勇者仁傑喺道場練完劍返屋企嘅時候，就聽到魔女歌莉喺屋裡面大聲呼叫：「勇者哥哥救命呀～」
仁傑立即拔出腰間嘅配劍破門而入：「勇者哥哥喺度，邊度有妖怪？」
歌莉：「救命～有小強（曱甴）呀！ ！ ！ 」
仁傑：「歌莉等我嚟，不過殺曱甴係唔使用劍嘅，用……」
歌莉：「我知！我知！係咪要用魔法啊？勇者哥哥你頂住先，等我而家即刻畫魔法陣。」
仁傑：「你咪畫魔法陣呀！一用魔法間屋就冇架喇！」
歌莉：「咁唔用魔法，可以用啲咩啊？」
仁傑：「其實殺曱甴用番梘水咪得囉。」
歌莉：「番梘水？平時我洗白白嗰啲？」
仁傑：「係呀。不過我哋要將高濃度嘅番梘水入落噴壺噴佢先得啊。」
歌莉：「係咪因為小強唔鍾意乾淨。所以幫佢沖涼就會死晒喇？」
仁傑：「梗係唔係啦。我哋要知己知彼先可以百戰百勝嘅。你知唔知道小強本身係咩嘢先？」
歌莉：「小強係曱甴。曱甴係…昆蟲…？」
仁傑：「無錯！小強本身係昆蟲，佢呼吸係用腹部上面嘅氣孔（Spiracle）。大部份昆蟲嘅身體表面都會分泌油脂以保持氣孔暢通，從而防止水分走入呼吸系統。所以，就算佢哋跌落水都唔會浸親架。不過，番梘水係表面活性劑（Surfactant），佢會令水嘅表面張力（Surface Tension）下降，導致水容易經由氣孔進入呼吸系統，最終令小強窒息而死。」
歌莉：「勇者哥哥果然係識好多嘢。等我仲以為用番梘水『毒』死佢添。」
仁傑：「歌莉你咁講其實都啱一半啦。因為利用番梘水殺死小強或者其他昆蟲背後嘅原理，其實仲有好多唔同嘅說法，啱啱所講嘅窒息而死只係其中一個解說。」
歌筣：「咁仲有咩原因呀？」
仁傑：「等我慢慢解釋下啦！其實係同番梘水嘅濃度、昆蟲嘅大細同佢哋身上角質層嘅厚薄有關嘅！濃度高嘅番梘水有機會溶解角質層表面嘅蠟，冇咗依層蠟，佢哋身體入面嘅水分就會較易蒸發，導致『脫水』而死。如果昆蟲嘅角質層較薄，或者身體細小嘅話，番梘水就有機會滲入佢哋嘅身體；由於細胞膜嘅主要成份係脂肪，所以番梘水會分解細胞膜並破壞細胞，就係你所謂嘅『毒』死喇！」
歌莉：「原來係咁，不過無所謂啦～總之番梘水就係小強嘅剋星啦！話時話，隻小強去咗邊？」
仁傑：「一定係我勇者個名嚇走咗佢啦～哈哈哈～」仁傑心聲：「好在走咗…其實我都好怕小強架…」
考考你：
仁傑所講嘅表面活性劑（Surfactant），除咗番梘水之外，仲有咩例子呢？
資料來源：
https://www.youtube.com/watch?v=uofrizDudpA
https://www.youtube.com/watch?v=-qS6nt1zuq8
https://en.wikipedia.org/wiki/Insecticidal_soap
