彎彎曲曲的自然美 – 創意教育組

如果有睇過關於巴西亞馬遜雨林嘅紀錄片,都可能留意到喺雨林中蜿蜒曲折嘅亞馬遜河。

 

大家有冇諗過點解亞馬遜河會係彎彎曲曲呢?

 

其實,喺大自然環境下,河流會受到地面傾斜程度、岩石、土壤軟硬度不同等因素影響,而由一條原本筆直嘅天然河道,慢慢變成彎彎曲曲嘅樣子(圖一)。

首先,河流喺由上而下流動,流動嘅河水會沖擦河道兩旁嘅土壤。由於河道兩岸嘅岩石、土壤等軟硬度不同,如河道左邊嘅土壤較鬆軟,就會較容易被河水沖擦、帶走而形成缺口,呢個過程稱為「侵蝕作用」。

 

如果河道左邊還居住了好多小動物,例如麝鼠,佢哋喺河道旁挖掘嘅地道會進一步增加及加速土壤嘅缺口形成(圖二),因而令河水帶走河道左旁更多土壤,令河道開始向左伸延。此時河水會偏向河道左旁流動,形成較急水流,產生更強嘅侵蝕力。相反,河道右方嘅水流速度則相對較慢,水中沙石等沉積物會較難被流水帶走而堆積起來(圖三),最終就形成向左彎曲嘅河道。流水經過向左彎曲嘅河道後,會直接沖擦河道右下方(圖四),造成侵蝕而令河道右下方嘅土壤崩解後退,久而久之,河流便會形成彎彎曲曲嘅河道,稱為「曲流」。
而曲流喺河川中下游時,會因為地勢較平而使其彎曲程度愈來愈大,最後兩個接近嘅彎曲河道會相連,河流又會重新形成一個筆直的新河道,舊有的曲流會淤塞而形成半月形湖,就好似牛軛一樣,故被稱為「牛軛湖」又或是「河跡湖」(Oxbow Lake)(圖五)。

冷知識:其實火星表面上亦有不少彎曲河道嘅痕跡,證明火星嘅表面曾經有液態水嘅存在(圖六)。

下一次,當大家睇到彎彎曲曲嘅河道時,不妨細心欣賞一下大自然喺長時間下繪畫出嚟嘅自然美喇。

圖片及資料來源:
https://www.youtube.com/watch?v=8a3r-cG8Wic
http://peru.com/actualidad/sabias-que/que-rio-amazonas-corre-al-reves-aqui-curiosa-respuesta-noticia-268862