回南天! – 創意教育組

唔知大家有冇發現每逢春天嘅天氣都非常潮濕🌫️,洗完嘅衫都要等好耐先會完全乾透👕,而且好容易就會產生一種發霉嘅氣味,甚至屋企嘅牆身會出現水珠或有滴水嘅情況💧。呢啲日子又被稱為「回南天」。

咁究竟咩係「回南」?
其實「回南」所指嘅係風向。香港嘅冬天主要受到東北季候風所支配,所以冬天嘅空氣都會較為寒冷以及乾燥❄️。但到咗春天嘅時候🌤️,東北季候風漸漸減弱,然後轉吹偏南風嘅時候就被稱為「回南」啦!

點解「回南天」嘅時候外牆會出現水珠?
由於冬天嘅時候溫度較低,建築物嘅混凝土會冷卻。而「回南天」嘅時候,偏南風會將海洋🌊上溫暖而潮濕嘅空氣帶到嚟香港。當呢啲溫暖嘅空氣遇上溫度較低嘅牆身時,空氣中嘅水份便會冷卻而凝結成為水珠💦。