如果身邊有人放屁💨，你都想即刻避開唔想俾啲屁臭親🤢。人類嘅屁都只係臭，但係某啲昆蟲嘅「屁」係一種武器💥，可以用嚟保住自己條命仔。
佢就係投彈甲蟲 (bombardier beetle)🐞，又俗稱放屁蟲，現時已發現超過500種嘅投彈甲蟲，佢地嘅棲息地有森林🏞、草叢🌱同沙漠🏜。大部分投彈甲蟲同成人手指甲差唔多大，有黑色腹部、啡色觸角、頭部同腳 （圖片唔係投彈甲蟲，以免出張真圖嚇親大家🙇♂️）。最特別嘅地方就係佢哋腹部末端可以噴射出高溫攝氏100度嘅物質去抵抗捕食者，而且身體外殼可以保護自己唔會受「屁」嘅傷害。
投彈甲蟲腹部入面有一對對稱嘅化學物儲存庫，一邊儲存對苯二酚 (hydroquinone)；另一邊儲存過氧化氫 (hydrogen peroxide)，當兩種化學物排到
同儲存庫相連嘅空間，入面有酶 (enzyme) 催化化學反應，閥門 (valve) 打開後液體狀態嘅化合物會氣化如子彈般噴射出🔫，一秒鐘射擊會分成500發脈衝彈射向捕食者，而且具熱力🥵。
所以如果有捕食者攻擊投彈甲蟲，佢會噴到敵人「一面屁」趕走人哋，但如果係活生生地成隻畀捕食者（例如︰青蛙🐸）吞落肚，佢仍然會係捕食者胃內「放屁」增加被嘔返出嚟嘅機會🤮，有43%嘅投彈甲蟲被青蛙捕食後能夠逃脫生還。
提提大家‼，投彈甲蟲嘅「屁」足以焫傷皮膚，喺香港應該就見唔到佢，但真係見佢就唔好手多多捉佢啦🚫。
