似蟹非蟹帝王蟹 – 創意教育組

又到帝王蟹🦀盛產嘅秋冬季節,老饕們有口福了🤤!小智早前都趁呢個時間買咗隻帝王蟹,但買嘅時候發現咗一個問題:「咦🤨?點解少咗兩隻腳嘅?明明上個月食果嗰隻大閘蟹係有兩隻鉗8隻腳架喎!呢隻帝王蟹有兩隻鉗,但只係得6隻腳嘅?」

於是,小智就同水產店老闆理論:「你隻蟹斷咗兩隻腳喎,計平D啦💰!」老闆蟹博士聽到之後,就心平氣和解釋俾小智聽:「介紹返,雖然帝王蟹望落去好似大閘蟹、花蟹、奄仔蟹嗰D螃蟹咁樣,但係其實帝王蟹喺分類學上同螃蟹唔係真係咁似架咋,反而帝王蟹係同寄居蟹更相近!」小智呢一刻嘅科學小宇宙突然爆發🤯:「但係,寄居蟹嘅尾部因為比較柔軟所以收埋喺個硬殼入面保護住,而帝王蟹就好似螃蟹咁有個堅硬嘅外殼嘅?」蟹博士🤓繼續循循善誘:「除咗帝王蟹,另一種叫瓷蟹嘅生物都演化出類似螃蟹嘅特徵,科學家將呢種趨同演化(convergent evolution)嘅過程稱為『蟹化』(carcinization),泛指甲殼動物嘅頭胸部(cephalothorax)變得更闊,而腹部位置則出現摺疊同縮短嘅變化🤏。」「哦!我今日真係學到好多嘢呀😲!」小智聽完之後感到上咗寶貴嘅一課,即刻開開心心咁俾錢買走隻蟹返屋企好好享受。

除咗蟹化之外,大家仲諗唔諗到其他趨同演化嘅例子呢?

 

#STEM

#Science

#Biology