【新系列 科幻放映會🎥】
我哋將會同大家分享電影/劇集/動漫中嘅科幻場境，以科學嘅角度同大家討論下裏面嘅科幻情節，等大家可以一路睇戲一路學STEM。
而第一集「科幻放映會」就想同大家討論《侏羅紀公園》🦖呢套經典電影啦！
喺電影《侏羅紀公園》裏面，一間生物科技公司喺發掘恐龍化石嘅時候發現咗
一塊相信係白堊紀時期(約1億年前)嘅琥珀，而呢塊琥珀裏面包住一隻吸咗恐龍血嘅蚊。之後科學家抽取出恐龍血入面嘅DNA🧬，再加入青蛙🐸DNA去填補遺失嘅恐龍DNA，最後成功復活恐龍。
如果要以現代科技實現到侏羅紀公園嘅故事，首先有幾個難題需要解決。
1.) 琥珀能夠完整地保存恐龍嘅DNA?
琥珀可以將佢裏面嘅物質徹底同外界隔絕，減低氧化機會，將幾千萬年前嘅物質甚至生物嘅DNA帶到嚟現代。但至今發掘到嘅琥珀裏面嘅DNA都已經被破壞同污染變成DNA碎片💔。
2.) 如果被保存嘅恐龍DNA只係其中一部份而唔係整個基因組，可唔可以好似《侏羅紀公園》裏面咁加入青蛙DNA去填補遺失嘅恐龍DNA又得唔得？
呢個方法理論上行唔通❌，因為喺基因上呢兩種係截然不同嘅生物，所以將兩種基因混合唔代表就可以復活恐龍
3.) 假設可以從化石提取完整恐龍基因復活恐龍，佢哋又能否生存到？
需要面對適應環境上嘅困難，尤其係大氣環境。白堊紀 時期大氣嘅二氧化碳比例係現時嘅4倍🌬，地表溫度都比現代高4度🥵。
但現代生物科技發展迅速，將來可唔可以復活到恐龍都係未知之數。不過恐龍復活後，佢哋應該住喺邊？被人圈養定放生野外？背後又會唔會有其他生物論理嘅問題呢？相信大家都可以思考下呢個問題🤔。
#STEM
#Science
#Technology
#Engineering
#Mathematics
