月球種到月桂樹嗎? – 創意教育組

中秋節神話故事除咗有嫦娥,仲有吳剛嘅故事。傳說佢偷懶唔做嘢,於是玉帝罰佢喺月亮斬斷月桂樹🪓🌳,但原來斬到半路棵樹會回復原狀。棵樹好頑強喎!返嚟現實,月球嘅條件點會種到月桂樹,但月球都有土壤,係咪可以用嚟種植呢?🌱

月球土壤來源係隕石撞擊後嘅碎屑☄️,岩石屬玄武岩同斜長岩。撞擊時候會產生玻璃,與此同時混入其中。泥土當中元素比較豐富有氧、矽、鐵、鈣、鋁、鎂。無有機物質,缺乏水分,而且混合鬆散,顆粒尖銳。💥

月球泥土無水、無有機物、唔夠植物必要元素,例如氮、鉀等,植物都無可能力生長到。大家可能即刻諗到好似施肥咁補返啲營養咪用得囉💦。無錯!2022年美國佛羅理達大學就係咁做,喺實驗室用月球土壤成功令阿拉伯草2日後芽🌱。可惜地發咗芽後,就無然後…第六日,葉同根生長都非常緩慢…望落都死氣沉沉。😵

第20日之後,團隊分析從月球土壤種出阿拉伯草嘅基因排列🧬,發現佢哋處於有壓力狀態唔能夠好好生長😫,例如生長於多鹽或多重金屬地方就會咁。同埋並唔係所有月球泥土都可以種出植物,實驗中只有當年登月任務「阿波羅11號」拎返嚟嘅泥土種到。🚀

雖然實驗無好顯眼嘅正面結果,但足以引起科學家思考如何發展太空種植去幫助航天發展,例如諗下係咪指定月球範圍泥土先可以種植?會唔會改造植物基因可以令佢哋喺月球少啲壓力?🤔

話唔定有一日航天發展真係做到月球種植同月球旅行,到時大家就可以中秋上月球扮吳剛斬樹!🌕

#Science

#Technology

#Engineering

#Mathematics