#科研深度遊│佢係箭豬定刺蝟？│第二集就同大家飛去澳洲探下啲動物朋友仔
今日科研深度遊帶大家去澳洲探下啲動物朋友仔。平時一講起澳洲動物，大家通常都會諗起袋鼠同樹熊。不過澳洲嘅生物多樣性超級豐富，擁有全球物種7%以上，
獨特嘅生物當然唔止得袋鼠同樹熊啦！
針鼴喺外形上同刺蝟好相似，但佢哋喺演化上嘅關係係非常之遠，絕對唔係近親關係。針鼴係屬於單孔目動物，而單孔目而家現存只有兩種物種，另一種都係澳洲嘅獨有物種 – 鴨嘴獸。
單孔目動物都係屬於哺乳綱嘅一種，但佢哋嘅特徵同其他哺乳類動物好唔同。當中最明顯嘅分別就係單孔目係卵生動物，所以針鼴同鴨嘴獸係世上唯二嘅卵生哺乳類動物
而單孔目另一個奇怪嘅特徵係同佢哋個名有關，單孔嘅意思係得一個窿，咁佢地邊個身體部位係淨係得一個窿呢？
答案就係排泄嘅位置啦。
針鼴同鴨嘴獸嘅腸道，尿道同生殖道都係同一個出口，得一個窿，而呢個特徵通常出現喺兩棲類、爬蟲類同鳥類，而唔會出現喺其他哺乳類身上。
澳洲之所以有咁豐富嘅生物多樣性係因為佢喺4500萬年前同南極洲版塊分離，自成一角，之後經過多年嘅演化誕生出好多新物種，而新物種又唔能夠跨越海洋去歐亞大陸/南極洲，久而久之就造就咗澳洲咁獨特嘅生物多樣性啦！
#Science
#Technology
#Engineering
#Mathematics
