《進擊的巨人》始祖巨人嘅來歷？

#科幻放影會│《進擊的巨人》始祖巨人嘅來歷？

2013年播出至今嘅《進擊的巨人》動畫喺2023年11月播出最終章。十年間作品嘅劇情、世界觀都帶比觀眾好多衝擊，最初巨人身世之謎更引人入勝。

（請注意：以下含劇透內容）小編今次就想同大家探討故事中角色「尤彌爾」同乜嘢生物結合而成為始祖巨人。劇情回溯到奴隸尤彌爾被追殺而逃跑，然後跌倒再沉落水中，呢個時候就有隻有非常多觸鬚嘅條狀生物黏貼咗喺尤彌爾嘅脊柱度（請參考頂圖），之後佢就變成始祖巨人喇！如果你係狂熱影迷，應該已經搜尋到有觸鬚條狀生物參考原型其實係史前動物「怪誕蟲」。

怪誕蟲(Hallucigenia) 生於寒武紀，距離至今約5億年前。呢個名唔係「種」稱，而係一個「屬」稱。生物分類學中有8個分層，由大至小排列為域(Domain)、界(Kingdom)、門(Phylum)、綱(Classe)、目(Order)、科(Family)、屬(Genus)、種(Species)。由此可見怪誕蟲可以再細分為唔同獨立品種。當時學者覺得呢種生物似夢中先會出現嘅物體，所以名為Hallucigenia，有迷幻嘅意思。

怪誕蟲身形似蚯蚓，但多6至7對帶有小鉗爪嘅腳，背部對等位置有尖刺（參考圖片如下）。最初被認為啲刺係腳，觸手喺背部送微生物入口，頭尾調轉咗；但有學者認為尖刺狀嘅腳不便行動，利用咁多觸手捕食會造成消耗嘅能量大過攝取嘅能量。後來得到更多化石樣本研究之後，相信尖刺向上有自衛作用，有小鉗爪嘅腳可以用嚟夾住水中食物，再順勢用頸部小觸手幫忙進食。喺動畫入面條怪誕蟲應該長1米，但根據化石樣本推斷，實際只長約5厘米。

圖片來源：維基百科

怪誕蟲係寒武紀嘅生物，究竟古生物學家點樣知佢嘅生存時期？

答案係：放射性定年法！

如果化石含有指定放射物質，可以測量放射性同位素(isotope)衰變物含量而推斷已成為化石嘅生物生於邊個時代。例如碳14(C-14)測量，C-14同位素喺大氣中只有少量，同大比數嘅碳12(C-12)一樣會被生物攝取，在自然界中有穩定嘅碳比例*。當生物死亡時，會停止吸收C-14， C-14就會慢慢衰變而減少。現時知道C-14衰變剩餘一半嘅時候（半衰期 half-life）需要約5730年，所以根據呢個參數可以知道化石有幾耐歷史，誤差上下約40年，但定年上限只到約60,000年。所以想知怪誕蟲化石係咪有更長遠歷史嘅話，就需要測量其他同位素衰變或者用其他定年法。

*因現化社會大量使用化石燃料，不斷影響自然界嘅碳比例而造成測量誤差

小編今次同大家介紹奇特生物，因為最近睇咗動畫「天地創造設計部」，故事係一班天堂設計師們為凡間設計動物，當中解釋唔同動物嘅身體結構如何幫助適應棲息地。下次再為大家介紹另一啲動物啦！（待續……）