點解秋冬香港好少打風？

#Meteorology │唔通真係有力場？點解秋冬香港好少打風？

從2010年至今，天文台一共為29個熱帶氣旋發出過八號信號，而當中就只有2個喺11月或之後懸掛。而最近嘅「銀杏」、「天兔」、「桃芝」同「萬宜」都係進入南海後，巧妙地「避開」香港。點解香港秋冬好少打風？其實同氣象學好有關係㗎！

首先要知道咩係颱風，其實「颱風」係熱帶氣旋嘅其中一個等級，香港天文台將持續風力達每小時118至149公里嘅熱帶氣旋定義為「颱風」等級。

熱帶氣旋喺海洋上形成並逐漸增強，一般係需要幾個因素：

• 溫暖海水：熱帶氣旋形成需要溫暖海水（通常26°C以上）。當海水受到陽光加熱，釋放熱量同濕氣到大氣時，形成一個潮濕、溫暖嘅環境。
• 對流活動：熱空氣上升同冷空氣下沉會形成強烈嘅對流活動，熱空氣上升嘅地方成為低氣壓區域，上升嘅暖氣團喺呢啲溫暖嘅區域移動時，會吸收更多來自海水嘅濕氣同熱量，為熱帶氣旋提供源源不絕嘅上升氣流。
• 地球自轉效應：由於地球嘅自轉活動，上升氣流開始圍繞著低氣壓中心旋轉，形成螺旋狀結構。海水的熱量越大，上升氣流就越強，熱帶氣旋亦會隨之增強並持續成熟。

• 海水溫度：熱帶形成需要溫暖的海水提供上升嘅暖空氣，隨著秋季到來，海水溫度開始下降，大大減少了熱帶氣旋形成同增強嘅可能性。
• 大氣環流：秋冬季節嘅大氣環流較為穩定，減少熱帶氣旋嘅形成同發展。另外垂直風切變同其他大氣因素（例如東北季候風）亦有機會令熱帶氣旋形成嘅機會降低同減弱。
• 地理位置：香港位於北半球嘅亞熱帶緯度，秋冬季節熱帶氣旋嘅路徑偏向較南海域，使得香港受到熱帶氣旋正面吹襲嘅機率降低。