小新一家人再次抽到公司的員工大獎，全家都有機會飛到泰國旅行，享受一下陽光與海灘。當然，亦由於係免費機票的關係，需要凌晨時份出發。小新一家於凌晨十二時到達機場，過關出境後終於準備登機。
小新帶著疲累的身軀向廣志說：「大叔呀，你下次可唔可以book早啲飛呀？好攰呀！專家話小朋友唔夠休息會影響發育㗎！」
廣志回應：「抽獎抽返嚟㗎咋，有得去玩咪好囉，仲嫌三嫌四！」
美亞暗諷：「係囉，想搭程靚機，就要靠你老爸升到職先得啦！」
廣志尷尬並轉話題：「小新，你想坐窗口位定係走廊位呀？」
小新一個箭步搶先走上機說：「我要坐窗口位睇風景！」
三個人安坐位置後，等飛機起飛，等呀等，延遲了半個小時還未有動靜。
美亞開始嘮叨：「乜咁耐㗎，免費機票真係冇咁好！」
此時，小新突然驚叫：「媽呀！唔單止delay咁簡單，你睇！隻窗有窿添㗎！咁危險嘅！？」
美亞非常緊張：「吓？係喎～乜攪啲咁嘅嘢呀？要即刻話俾機長知先得！」
廣志鎮定地說：「你哋唔好大驚小怪失禮街坊啦！所有飛機嘅窗都有依個『排氣孔』㗎！你哋有冇發現隻窗有幾多層呀？」
小新：「1、2、3、4、5、6……」
廣志：「我唔係問你有幾多隻窗，係隻窗有幾多層喎！」
小新不耐煩：「大叔，你有冇常識㗎？窗係透明㗎，點數到喎？」
美亞：「我知！之前聽人講係有三層！話會安全啲喎！」
廣志乘機說好話：「老婆大人真係美貌與智慧並重！其實嗰個細窿係喺中間嗰層㗎！主要係用嚟調節飛機所受嘅壓力。」
美亞扮無知：「乜飛機飛得多都會有工作壓力㗎？」
廣志再次科學家上身：「唔係呀，其實高空嘅氣壓會比較低，所以機艙入面嘅氣壓要keep住等同或少於二千米高嘅大氣壓力，我哋先可以呼吸同保持正常狀態。不過咁做，機艙就會由內到外承受好大嘅壓力，令到機身會脹咗……」
美亞插咀：「咁咪好似個氦氣球升上天咁，升到去某個高度會爆！？」
廣志解釋：「咁又冇咁驚，機身本身又堅固過個氣球好多，而且最外面嗰層窗口都好硬㗎！當機艙入面嘅氣壓上升，壓力就會透過依個細窿仔壓向最外面嗰層，等佢承受大部分嘅壓力！萬一外面嗰層真係裂開咗，都仲有中間同最入嗰層頂住，『排氣孔』亦可以慢慢咁緩和壓力，等機師有時間去調節飛機嘅高度。另外，如果外面嗰層受壓太大而導致有微細嘅裂紋，飛機工程師亦都可以喺外面好容易同方便檢查得到！」
小新一面呵氣到飛機窗，一面用手指在水氣上亂畫：「入面嗰層仲可以用嚟畫公仔喎！」
廣志笑道：「係呀，仲可以用嚟阻擋住好似你依啲咁百厭嘅細路，直接掂到外面嗰兩層窗，影響安全囉！」
此時，一位美麗又年輕的空姐走過廣志的身邊，輕輕微笑說：「依位先生都講得幾詳細喎，不過我哋就快起飛啦！不如扣返好安全帶先啦！」
廣志立刻收起鬆弛了的大肚腩，勉強地扣起安全帶，扮瀟灑地說：「哦，依啲都係小意思啫！我小學嘅時候係摺飛機大賽冠軍嚟㗎，不如我地慢慢交流一下？」
美亞一面扭著廣志的耳朵，一面說：「乜你唔係臭腳夾波子比賽冠軍咩？」
小新看見空姐後又嚷著要調到近通道的座位：「大姐姐，我都好叻㗎！我知小飛俠係飛得快過小飛象㗎！」
空姐向著小新笑道：「小朋友，飛機要飛㗎喇，乖乖坐低先。你既然咁叻，不如我考下你！知唔知點解飛機個窗唔係好似屋企嗰個窗咁係長方形，而係橢圓形呢？」
小新：「嗯……靚女，有冇貼士先？」
你可以為小新解答這個問題嗎？
資料來源：
http://www.dailymail.co.uk/sciencetech/article-3078042/So-S-plane-windows-contain-holes-Expert-reveals-air-conduit-acts-failsafe-protect-craft-outer-pane-cracks.html
http://www.dailymail.co.uk/travel/travel_news/article-3406445/Why-aren-t-plane-windows-square-Experts-explain-simple-crucial-reason-curved-shape-vital-aircraft-safety.html（空姐的貼士）
