人類每一個咳嗽或乞嚏中包含1000至40000粒飛沫，時速更高達177公里！而飛沫更加係疾病嘅傳染途徑之一，例如新型肺炎、流感、肺結核等疾病，病毒、細菌會隨患者嘅飛沫依附喺其他人嘅結膜、鼻黏膜同埋口腔黏膜，因而受到感染！
麻省理工學院嘅學者發現，人類嘅飛沫最遠飛行距離為2.5米！換言之，如果半徑2.5米內有人不斷咁打乞嚏，都有可能被佢發出嘅「局部地區性飛沬雨」淋到！
更值得注意嘅係，現時正值冬季，將更加有利病毒傳播，氣溫低較適合病毒生存，而乾燥環境下飛沫水分更易蒸發，重量變輕令病毒可以傳播得較遠，再加上人都會傾向留喺密封嘅地方取暖，如果無相關預防措施，疾病就好易喺人群中蔓延！
所以，如果病咗或「高度懷疑」自己或其他人病咗最好都戴返個口罩，避免疾病透過飛沫傳染。但想咳或打乞嚏又唔記得左戴口罩可以點做呢？針對呢個尷尬嘅時刻，美國疾病管制局建議，用紙巾或手巾仔捂住口鼻都係一個可行嘅方案。所以大家如果真係要出街，記得帶齊衛生物品出街啦！
創新科學中心
https://ccst.hkfyg.org.hk/
創意科藝工程計劃
https://lead.hkfyg.org.hk/
