通常中學生物書第一課就會講乜嘢係生物！生物必須具備新陳代謝、生長、繁殖及適應等多種特徵。根據依幾點，病毒一直被認為並非生物，但亦有唔同論點話病毒有一定嘅生物特徵。今日就等我地一齊探討下啦！
首先，新陳代謝代表細胞有能力獨立將食物轉換為能量。病毒唔似動物細胞，佢自己係冇進行新陳代謝嘅能力！佢嘅生存、成長必須依靠進入宿主細胞後利用佢嘅細胞器「代工」。因此病毒係無獨立代謝嘅能力架！
而繁殖方面，喺之前【細菌與病毒】都講過，病毒同樣需要依靠宿主繁殖！病毒喺進入宿主後，會將自己嘅遺傳物質加插到宿主嘅細胞入面，命令宿主製造病毒嘅各個部份。細胞就好似一個病毒工廠咁，製造好嘅「零件」會做埋組裝，從而「繁殖」新嘅病毒！
但係亦有人指出病毒有適應嘅特性，即係生物能夠配合不同環境而生存。例如病毒可以依照宿主嘅狀態決定有利嘅繁殖方法，病毒亦可以透過基因變異而增加存活等。所以病毒係唔係生物，都有唔同論點，唔知你又點睇呢？
創新科學中心
https://ccst.hkfyg.org.hk/
創意科藝工程計劃
https://lead.hkfyg.org.hk/
