南極有西瓜味嘅雪? – 創意教育組

過去幾個禮拜,喺南極加林德斯島研究基地嘅雪地由原本白色變成血紅色,唔通發生兇殺案?非也非也,原來呢個現象係因為「西瓜雪」嘅形成。

你可能會問,西瓜雪係咪甜品舖嘅西瓜刨冰?西瓜雪其實係一種血紅色嘅雪,而且散發出一陣西瓜嘅氣味。呢種雪嘅出現係由一種名為極地雪藻(Chlamydomonas nivalis)嘅藻類所造成。

極地雪藻係單細胞藻類,佢哋會喺冬天冬眠,直至春天喺雪地上出現液態水嘅時候,極地雪藻就會迅速繁殖。極地雪藻喺幼體期係綠色嘅,而且佢哋有兩個名為鞭毛嘅尾狀結構,能夠自由游走。但佢哋成熟嘅時候就會失去活動能力,並且發展出獨特嘅結構嚟適應極端環境,包括一層能夠保護雪藻避免受到紫外線破壞嘅絕緣細胞壁,同埋一層有助雪藻吸收更多能量嚟融化周圍嘅雪嘅蝦青素,所以佢哋就由綠色變成左橙色同血紅色。

創新科學中心
https://ccst.hkfyg.org.hk/
創意科藝工程計劃
https://lead.hkfyg.org.hk/