來自沙漠的髮菜? – 創意教育組

年又過年共慶歡樂年年~🎉

一年容易又農曆新年啦🥳!迎接農曆新年梗係唔少得團年飯啦!團年飯嘅菜單都好著重意頭,而當中「發財好市🧧」,即係髮菜配蠔豉,一直深受大家歡迎。髮菜,大家都可能食過,但你哋又知唔知其實「髮菜」係咩嚟呢❓

我哋日常所食用嘅「髮菜」主要分為兩種,一種嚟自沙漠🏜,亦都係大家傳統所認知嘅「髮菜」,而另外一種就嚟自海洋🌊,被稱為「海髮菜」。

嚟自沙漠嘅呢一種「髮菜(Nostoc flagelliforme)」,係屬於「藍菌門(Cyanobacteria)」嘅陸生藻類,呢一種藻類具有耐高溫🔥、嚴寒❄️及抗乾旱嘅生長特性,所以較多生長於中國甘肅、新疆、內蒙古等等乾燥貧瘠嘅沙漠地區。而我哋見到「髮菜」好似黑色毛髮係經過採收、挑選、風乾及整形包裝🏭之後嘅樣子。

「髮菜」本身無任何特殊嘅風味,純粹因為佢個名好意頭,但佢嘅生存對生態環境就十分重要。「髮菜」可以為土壤保水💧,更扮演住固沙嘅角色,過度採集「髮菜」對草原生態環境造成非常嚴重嘅破壞,加速草原沙漠化⚠️!

直到2000年,「髮菜」從《中華人民共和國野生植物保護條例》嘅保護級別由第二級提昇至第一級,除咗嚴禁採集之外,亦都禁止❌「髮菜」以及相關製品嘅收購、加工、銷售以及出口。所以,我哋而家食到嘅「髮菜」主要以「海髮菜」取代,亦有少數以人工種植髮方式嘅產品係市面出現。之不過,香港消費者委員會曾經係2009年測試市面上嘅「髮菜」,發現有不發商人以澱粉、海藻酸鈉或粟米鬚加以染色,欺騙消費者❗如果大家選購嘅時候記得要留意產品標示以及來源。

為咗保護環境♻️,大家可以選擇髮菜嘅代替品,例如代表「生財」嘅生菜🥬都唔錯架!

最後,祝大家農曆新年快樂!