如果突然無咗月亮…… – 創意教育組

咁我哋就無得賞月啦🌕……當然唔只咁小事,我哋生活空間仲會面臨大轉變😱。
首先有個好消息🎉,就係大家返學返工時間可以縮短啦😎!因為月球引力令地球維持24小時自轉一圈,月球消失咗嘅話,地球用6至8小時就轉完一圈。

但有一連串壞消息要通知大家……講到一日得6至8小時,我哋嘅生理時鍾會非常混亂而影響健康🤒。以為調節到就無問題?事情無咁簡單。地球自轉快咗,風速都會加快🌬,可高達480公里每小時,大部分空中同陸地生物都被吹走,人類亦唔能夠立足大地。

除此之外,月球同潮汐關係重大,如果無咗月球,海水潮汐會變成主要由太陽控制☀,但力量會係月球嘅三分之一。雖然力量細咗,但引力影響突然轉成太陽會令海水向太陽方向翻起大浪湧上陸地🌊,我哋嘅居所一定會受到影響。
以為喺海入面就冇事?無月球嘅洋流都會失去引力循環,海底營養帶唔到上海面,表面含氧量高嘅海水又帶唔到落海底,所以海中生物都難逃一劫,到時就無海鮮食lu🦞🦀。
未講完㗎,無咗月球引力,地球🌍嘅自轉軸唔能夠同公轉軌道維持23.5度嘅傾斜,而會變成同公轉軌道垂直,太陽全年就只會直射到赤道嘅位置,緯度愈高嘅地方就永遠都咁凍🥶,難以形成四季,限制生物的活動地區之如,亦對令我哋種植農作物變得十分困難🌾。
無咗個月亮仲有好多影響架,不過今日就講住咁多先!睇完以上嘅假說,你會點樣選擇?想十五有滿月睇🌝、中秋食月餅🥮,定係想月亮消失,工作少幾粒鐘?