韓國小食「椪糖」 – 創意教育組

相信大家最近都俾一套韓國劇集🦑洗哂版,入面提及一種韓國小食 – 「椪糖」。製作椪糖🍬嘅材料好簡單,包括砂糖同梳打粉。只要將砂糖倒入大湯匙用火加熱🔥,糖變得濃稠後,加入少量梳打粉直至糖漿膨脹或者壓平,等待硬化就食得。韓國人更加會喺糖餅上面用模具印上圖案,之後用牙籤篤出花紋而唔破壞圖案當作小遊戲🎯。

製作椪糖主要涉及兩個化學反應。👩‍🔬第一個係焦糖化反應 (Caramelization),當中椪糖嘅主要成份砂糖係蔗糖 (Sucrose),屬於雙糖結構 (Disaccharide)。蔗糖加熱到160度或以上嘅時候,糖會脫水,當中嘅氫同氧會蒸發走💧,之後會分解為兩個單糖結構 (Monosaccharide),分別係葡萄糖 (Glucose)同果糖 (Fructose)。因為熱力♨️,糖分子會得到更多能量互相碰撞產生而更細嘅化學物質,再組成新嘅化合物,例如麥芽酚(Maltol)、羥甲基糠醛(5-Hydroxymethylfurfural)、丙烯醛(Acrolein)等,呢啲新組成嘅化合物會令砂糖變成啡黃色同產生香氣🍭。

🧑‍🍳第二個化學反應就係梳打粉加熱時放二氧化碳。梳打粉嘅化學名稱係碳酸氫鈉 (Sodium bicarbonate)🧪,當佢遇熱嘅時候,會釋出二氧化碳,呢啲二氧化碳氣泡會被困喺焦糖漿入面,令到焦糖漿發脹。椪糖食落去嘅鬆化口感😋,就係來自呢啲由二氧化碳形成嘅窿,大家下次食嘅時候都可以留意吓架!

雖然椪糖容易整,有得食又有得玩,但其實用咗好多糖去整,為咗身體健康都係少食為妙啦❗️

 

圖片來源:《魷魚遊戲》