琥珀

#虎視STEMSTEM

喺電影「侏羅紀公園」裏面🦕，一間生物科技公司喺發掘恐龍化石嘅時候，偶然發現咗一塊相信係白堊紀時期(約1億年前)嘅琥珀，而呢塊琥珀裏面包住一隻吸咗恐龍血嘅蚊🦟，科學家透過抽取血裏面嘅DNA 🧬，最終成功「復活恐龍」🦖。

當然我哋以現代嘅科技嚟睇，「侏羅紀公園」「復活恐龍」呢件事暫時係冇可能嘅🙅‍♀️，但係裏面講到琥珀可以將幾千萬年，甚至成億年前嘅生物同DNA帶到嚟現代，又有冇可能呢😲？

琥珀(Amber)呢個名相信好多人都聽過，但就未必知道琥珀係咩嚟。琥珀係幾千萬年前古老樹木嘅樹脂(留意唔係樹汁！)，屬於化石嘅一種。當樹脂由松柏科植物滴落地面💧，再經多年嘅掩埋同地質化，最後會慢慢固化成琥珀。喺樹脂凝結之前，可能會有昆蟲或者小動物被樹脂嘅香味吸引🐝，佢哋一旦被樹脂黏住，就好難逃脫，最終永遠咁被困喺琥珀裏面。

正正因為琥珀可以將佢裏面嘅物質徹底同外界隔絕，所以可以好完整咁將幾千萬年前嘅物質甚至生物帶到嚟現代。喺2016年，一塊包住恐龍尾嘅琥珀喺緬甸出土，而呢條恐龍尾嘅特別之處在於佢係有羽毛🕊，呢個發現令我哋知道原來有啲恐龍唔係好似我哋以前諗嘅光禿禿樣子👨‍🦲，而係好似雀仔咁毛茸茸㗎🐥！

雖然琥珀係有可能儲存咗古代生物嘅DNA，但至今發掘到嘅琥珀，裏面嘅DNA都已經被破壞同污染。所以，好遺憾地，將恐龍復活呢件事仍然只可以停留喺電影同幻想中💭。