會高呼的四腳爬爬 – 創意教育組

珠頸斑鳩會「咕姑固」咁叫;噪鵑會「哦啊」咁叫,咁壁虎係點叫🦎?吓!壁虎識叫㗎咩?你喺屋企聽到嘅「嘰嘰」聲就係由佢發出㗎啦。呢位喺大家屋企白食白住嘅同居夥伴,究竟有咩來歷呢?🏠

香港壁虎分3大屬,分別係截趾虎屬 (Gehyra)、壁虎屬 (Gekko) 同半葉趾虎屬 (Hemiphyllodactylus)。喺香港有8個品種,包括截趾虎、壁虎、大壁虎、原尾蜥虎、密疣蜥虎、鋸尾蜥虎、疣尾蜥虎同香港半葉趾虎。香港半葉趾虎 (Hemiphyllodactylus hongkongensi) 係香港發現物種📍,所以由香港研究者為佢明名。根據2018年香港浸會大學生物系研究,當時已知生態群有蒲台島、石鼓洲同港島郊野公園邊陲🏞,但發現數量唔多。佢哋啡身帶橙色花紋,第一手指無爪,手指與腳趾下嘅皮瓣好似葉脈呈分裂狀🌿。

而喺屋企常見品種係原尾蜥虎同截趾虎。原尾蜥虎身體係啡色🤎,隨環境與溫度變化,身上顏色嘅深淺都會改變。截趾虎顏色係灰白色🤍,身體望落有少少透,會見到少少內臟顏色。

壁虎係夜行動物,主要食細少昆蟲,例如曱甴🪳、螞蟻🐜、白蟻等,所以對家居嚟講,佢哋可以幫手清走啲害蟲。但佢哋又會到處排便,有時係牆上見到有啲細粒乾咗嘅結塊,就係佢地啲便便💩。

壁虎有三特徵,包括可以反地心吸力攀爬、斷尾同發出響亮叫聲。佢哋可以反地心吸力攀爬🧗🏽,因為每隻腳下有約50萬條剛毛,剛毛可以同接觸面產生強大摩擦力。斷尾就有助逃離敵人,之後可以再生,但原來每斷一次,脊椎就會少一截,所以並唔可以無限次使用呢一招🙅🏻。至於佢哋叫嘅原因,根據漁農署第13期「香港物種探索」,唔同品種壁虎嘅叫聲有與同類互動或防衛之用🤼。

到「香港生物多樣性資訊站」網頁可以認識更多唔同壁虎嘅資料。或者喺屋企多啲留意下有冇壁虎嘅叫聲,睇下佢係咪養到肥肥白白,小編屋企嗰隻有次爬咗入盒曲奇餅,打開當堂嚇一跳……

#STEM

#Science

#Technology

#Engineering

#Mathematics