斯洛文尼亞的龍之洞穴

#科研深度遊│斯洛文尼亞的龍之洞穴│文中介紹嘅國家你會唔會想去？

同大家去下啲冷門地方旅遊先，今次去中東歐地區嘅一個國家─斯洛文尼亞。呢個國家嘅特色多自然風光，其中出名嘅勝地有波斯托伊納洞，係世界最長、最大嘅溶洞之一。

洞入面有數以千計嘅鐘乳石 (Stalactite) ，需要好長時間先可以形成。由於洞內岩石含有碳酸鈣，當有二氧化碳嘅水濕透岩石，水、二氧化碳加碳酸鈣會變成碳酸氫鈣溶液 (Calcium hydrogencarbonate) 。水珠滴落地面蒸發後，碳酸鈣會沉澱，之後再堆砌成柱，形成鐘乳石。

除咗鐘乳石，仲因為有「龍」居住喺洞內而令岩洞聲名大噪。所謂嘅「龍」，其實係稀有動物—洞螈 (Olm, 學名：Proteus anguinus)

洞螈—圖片來源：每日頭條

洞螈係兩棲類動物，歸洞螈屬，洞螈種，呢個洞係佢哋嘅主要棲息地。洞螈身體似蛇，可生長到約30厘米，有四肢，頭部有似角嘅紅色外鰓，全身皮膚呈半透明粉灰色，退化嘅眼睛都被皮膚包裹。成個外型同神話故事中龍嘅形象相似，所以有人形容佢地係「幼龍 (Baby Dragon)」。

洞螈係洞穴水中最高捕獵者，會食無脊椎動物，但佢哋係零視力，純粹靠皮膚嘅感光功能，同埋耳內黏膜感應水振動，從而了解獵物所在。除咗身體結構令洞螈可以適應洞穴生活，佢哋嘅身體仲演化到可以10年唔進食都無問題，而且壽命可以長達100年，每10年繁殖一次。

洞螈長居洞穴水底，加上繁殖期相隔時間長，令好多研究都難以進行，所以國際自然保護聯盟列洞螈為易危物種 (Vulnerable)，希望能夠保護佢哋。斯洛文尼亞除咗發展相關保育同研究，亦為波斯托伊納洞發展生態旅遊，入面有相關展覽，特別仲有研究團隊試過人工孵化洞螈嘅珍貴分享。