風暴過後，媽媽叫小新去檢查家中的鋁窗，看看有沒有受損和是否需要維修。
「媽媽，等等先，我上網睇到一條片（片段：https://goo.gl/1E7oKU），原來鋁係會生頭髮架，咁放隻鋁窗喺爸爸個頭到咪唔使用生髮水囉！」小新說道。
美冴：「哦，依個係一個特別的化學反應嚟嘅啫，又唔係所有鋁都會咁嘅。」
小新不解：「咁點解片中嘅鋁會生頭髮嘅？」
美冴：「好彩你阿媽我都叫讀過下化學！要知道點解會有咁嘅現象，我哋首先要認識下鋁呢隻金屬先。其實，鋁本身係地球上其中一種最普遍嘅元素，而佢嘅密度比一般金屬為低，而且十分之輕，飛機嘅金屬架就需要用到鋁喇。但純鋁亦係一隻非常活躍嘅金屬，無論係酸定係鹼都可以同鋁產生化學反應，所以提取鋁嘅技術要去到二十世紀中葉先開始成熟，導致佢嘅價格喺一百年前比黃金仲要貴。」
小新更不明白：「既然妳講到鋁咁唔穩定，咁點解屋企啲窗又會用鋁做嘅？」
美冴：「正正因為鋁太過活躍，當鋁一被製造出嚟之後，佢嘅表面即刻同空氣中嘅氧產行化學反應，形成一層氧化鋁，穩固咁黐實喺表面上，變相形成一層保護膜，唔容易被水或者其他物質侵蝕，呢個過程喺化學上稱之為鈍化（Passivation），令到鋁除咗輕之外亦都極之穩定。」
小新：「好啦，我聽咗一整堂化學堂喇，不過阿媽你兜咗咁大個圈都未解釋點解片中嘅鋁會生頭髮喎！」
美冴：「哈哈！被你識穿咗添！聽住喇，呢個化學反應其實幾複雜，不過最主要係鋁同水銀接觸而產生鋁汞合金（Aluminum Amalgam），再同空氣接觸變成一條條絲質嘅氧化鋁。不過要做到呢個化學反應，必須要用強酸洗走上面嘅氧化層。喺一般情況下，呢個反應係唔會發生架！所以你唔駛擔心我哋啲窗會生「頭髮」！小新你去邊呀？」
小新：「既然鋁咁穩定，都唔駛我check啦，我去搵妹妹玩喇，bye~」
注意！
片段中的鋁與水銀的反應需要使用水銀及鹽酸，兩者均對人體有害，大家切勿在家中嘗試。
參考：
https://www.livescience.com/28865-aluminum.html
https://en.wikipedia.org/wiki/Aluminium
https://en.wikipedia.org/wiki/Aluminium_alloy
https://eic.rsc.org/exhibition-chemistry/the-real-reactivity-of-aluminium/2020076.article
https://zh.wikipedia.org/zh-hk/%E5%87%86%E6%99%B6%E4%BD%93
