今年十二月是志明和春嬌拍拖三周年的紀念日，他們正討論到哪裡旅行慶祝。
「不如去歐洲吖，落雪都幾浪漫喎！」志明提議。
「去歐洲好貴㗎喎，唔好嘥埋啲咁嘅錢啦！」春嬌反對。
「咁不如去泰國吖，仲可以順便避寒添！」志明繼續提議。
「冬天緊係凍㗎啦！泰國又熱又曬，我唔想曬到咁黑喎！」春嬌繼續反對。
「咁不如去你最鍾意嘅台灣吖！又可以去夜巿掃街狂食喇！yeah!」志明再繼續提議。
「你都識講『又』啦！啱啱先去完，你有冇新意㗎？」春嬌再繼續反對。
志明嘗試控制自己的面部表情，強行擠出笑容說：「咁你有咩好建議先？」
春嬌「提示」道：「我冇乜所謂㗎，最好就係可以欣賞到冬天嗰份冰冷嘅淒美，浪漫得嚟又唔使咁凍嘅地方！」
志明終於醒覺：「好喇，我知道喇，去日本浸溫泉好唔好？」
春嬌興奮地說：「好呀～一邊睇雪景一邊浸溫泉，一定好舒服啫！」
志明苦笑道：「不過你唔係話怕熱咩？」
春嬌反駁：「依種熱又點同呢？我平時都會焗桑拿同沖熱水涼啦！三十幾四十度都冇問題呀！」
志明續問：「咁如果成一百度嘅溫泉呢？」
春嬌笑道：「一百度？！嗰啲唔係叫做溫泉，係叫做油鑊呀！」
志明回應：「其實溫泉嘅定義係好廣泛嘅，亦都未有一個單一嘅分類，只要嗰啲天然湧出嘅泉水係由地熱能升溫嘅話，都可以叫做溫泉！有人認為只要泉水嘅溫度高過周邊空氣嘅溫度已經叫做溫泉，亦有人覺得要高過人體體溫先算係。不過有啲好熱嘅溫泉真係可以去到九十幾一百度㗎！」
春嬌驚訝：「吓？真係㗎？！咁仲邊有人會落去浸喎？咩都死啦！」
志明突然認真起來：「咁又唔係咩都死喎，有種細菌叫做水生棲熱菌（Thermus aquaticus），係一種嗜熱嘅細菌，佢地好鍾意住喺依啲咁高溫嘅地方。」
春嬌疑問：「咁熱有咩好住喎？」
志明解釋：「其實唔同物種之間都會爭奪天然資源嘅；如果依隻細菌可以罕有咁進化到喺一個咁熱嘅環境下都生存到，冇其他物種同佢競爭，咁都幾梳乎吖！」
春嬌疑問：「梳乎？咁佢地有咩食先？」
志明大笑：「哈哈，成日掛住食！其實溫泉入面有好多無機嘅化學物，依類型嘅細菌會以化能合成作用（Chemosynthesis）去合成有機物質俾自己；情況就好似植物嘅光合作用咁，只不過今次唔係用太陽光，而係利用化學反應嚟做能量嘅來源！」
春嬌立刻回應：「嘩，原來唔只植物係食物鏈入面嘅生產者，細菌都可以做producer！」
志明讚賞道：「叻女喎！喺溫泉冇咁熱嘅地方，都會有其他嘅細菌或者藻類一齊共存，成為一個特有嘅生態系統！都係嗰句啦．．．」
春嬌插咀：「我知喇生物學家，你想講每種生物喺大自然都有佢嘅生存之道同特有嘅價值，要好好保護嘛？」
志明興起：「嗯！講開價值，其實依種嗜熱細菌對人類都好大貢獻㗎！因為佢地體內嘅酶係唔怕高溫嘅，所以有科學家就利用其中一種酶嚟做聚合酶鏈式反應（Polymerase Chain Reaction, PCR），大量複製特定位置嘅DNA，所以佢地對生物科技嘅發展好重要㗎！發明PCR嘅科學家仲攞埋諾貝爾獎添！」
春嬌咀嘟嘟地說：「夠喇好嘛？人地想浸個溫泉啫，使唔使講到諾貝爾獎咁遠呀？」
志明立即抱住春嬌：「Oh sorry 呀BB豬，一時講得太興起添！咁我依加即刻上網訂機票同最靚嘅溫泉酒店先！」
參考資料：
https://serc.carleton.edu/microbelife/extreme/extremeheat/index.html
https://en.wikipedia.org/wiki/Hot_spring
