月魚
農曆新年假終於到來，志明決定帶春嬌回到當年表白的海馬公園，重溫浪漫情景。由於今天是假期，海馬公園一早已經人山人海，逼得水泄不通。經過一番商議，志明和春嬌打算避開最多人潮的機動遊戲，先到水族館參觀。
當他們進入水族館之時，一名心急的遊客打尖跑入，撞跌了前面一個小朋友卻不顧而去，春嬌見狀立即上前扶起小朋友。
「啲人咁無品㗎！撞親人唔道歉，仲走咗去！」春嬌一邊扶起小朋友，一邊暗罵那位遊客。
「小朋友，你有無受傷呀？」志明都走上前看看有甚麼可以幫忙。
小朋友搖搖頭，甩開春嬌的手，跑回媽媽身邊。
「點解啲人可以同啲魚一樣咁冷血無情㗎？」春嬌非常不解的說。
「唔係所有人都係咁嘅！」志明想安撫一下春嬌不憤的心情。
「但係所有魚都係冷血。」春嬌看看水族館內大魚缸的魚，感慨的說。「我記得魚類係變溫動物嚟。」
「以前可能係，不過最近科學家發現咗有種魚，同哺乳類一樣可以保持身體溫暖喎。睇嚟歷史係時候要改寫啦！」
「真係㗎？」春嬌又用她撒嬌的聲線。
「嗰種魚叫月魚，佢即使生活喺水溫好低嘅深海，肌肉仍然能保持喺13-14℃。」
「恆溫唔係要維持37℃先啱架咩？」
「其實恆溫動物嘅定義係唔需要依賴外界溫度亦能夠調節自身溫度嘅動物，當外界溫度升高時能夠排走多餘嘅熱量；相反，當外界溫度降低時能夠產生額外嘅熱量。」
「咁佢哋係點做到㗎？」
「一般嘅魚喺魚鰓做氣體交換嘅時候，海水會經過魚鰓帶走大部分嘅熱量。所以一般嚟講，魚嘅體溫會維持喺所屬水域嘅水溫範圍。不過月魚鰓嘅血管有個複雜嘅網絡，同哺乳類動物嘅細脈網有啲相似。細脈網喺由動脈同靜脈緊密相連而成，由於月魚嘅靜脈血返去心房之前會經過胸部肌肉而微微加溫，透過細脈網結構，動脈同靜脈可以利用逆流交換熱量，令離開魚鰓嘅動脈血仍然保持一定溫度。」
羊的細脈網
春嬌認真地聽着，而志明則繼續補充：
「其實除咗月魚，大白鯊同鮪魚都可以將體溫短暫性提高，令佢地可以瞬間加速，成為強勁嘅掠食者。而原理都係透過升溫嘅靜脈血嚟保持動脈血嘅溫度。」
春嬌認真地聽着，而志明則繼續補充：
「哇！你好叻呀！」春嬌凝視着志明博學多才的背影，不禁讚嘆起來。
志明見春嬌聽得如此陶醉，感到非常滿意。
「咁大個海都總有啲魚唔係冷血嘅，所以地球上都總有啲人唔係無情架，你眼前咪就有一個囉！」
春嬌會心微笑，挽着志明的手繼續欣賞不同的海洋生物。
資料來源：
http://pansci.asia/archives/79462
https://en.wikipedia.org/wiki/Rete_mirabile
http://www.popsci.com/earth-infrared-laser-dogs-and-other-amazing-images-week?image=4
