小新：「媽咪，爸爸今個月係咪無俾家用你？」
美呀：「佢一早俾咗啦，個死佬邊夠膽遲俾我！」
小新：「咁點解屋企洗啲衫咁大陣味嘅？仲以為你無錢買洗衣液添！」
美呀：「無法啦！夏天成日落雨，天氣又悶熱，啲衫都乾唔切，你阿爸又唔肯買部乾衣機。」
小新：「媽咪，但係真係好大陣味吖。」
美呀：「我都知吖，洗咗幾次都係咁…」
剛剛志廣放工回家，聽到以上的對話。
志廣：「老婆大人，其實嗰陣味係霉味，只要用白醋就可以解決。」
美呀：「白醋？我平時煮餸嗰啲？」
志廣：「係吖，其實霉味嘅來源係來自黴菌。黴菌散佈於空氣當中，幾乎無處不在。啲衫長時間唔洗，加上天氣潮濕悶熱，就會令黴菌大量繁殖。如果你唔係用含有殺菌成份的洗衣液，即使你洗完衫都會有黴菌係件衫到。所以，只要你喺洗衫之前，用白醋加水（1:1,000）浸一陣，隔10分鐘左右先再去洗，白醋中嘅醋酸就可以殺死黴菌，啲衫就唔會有霉味㗎喇。」
小新：「媽咪，咁你快啲用白醋殺晒所有黴菌啦！」
志廣：「小新，唔係所有黴菌都係唔好嘅。早期嘅抗生素─青黴素（Penicillin，或音譯盤尼西林），就係由青黴菌提煉出嚟。仲有平時你最鍾意食嘅芝士，都係由黴菌製成嘅。」
美呀：「老公，你真係好叻叻吖，原來黴菌都有好壞之分。不過我估爸爸為咗全家啲衫着想，係絕對唔會介意下個月加家用俾我去買白醋殺死堆壞黴菌。」
志廣：「…」
考考你：
黴菌經常用作食物加工，例如上文提及的芝士，你猜還有哪些食品是利用過黴菌加工製成？
