為咗公共衛生，大家搭𨋢時應該喺按鍵上面都見到痴住一塊膠膜，上面寫住定期消毒。但近期發現有升降機按鍵冇痴上膠膜，並指已噴上「納米觸媒」，可於二十四小時內分解細菌。另外仲發現網上有「光觸媒口罩」。究竟「納米觸媒」係乜嘢新科技，可以「殺菌於無形」？
「納米觸媒」其實係指運用咗「納米科技」嘅「光觸媒」。光觸媒(Photocatalyst)又稱之為「光催化劑」，係一啲有光嘅環境下加速化學反應嘅物與，最常見嘅就係二氧化鈦(Titanium Dioxide, TiO2)。我哋可以將光觸媒噴喺唔同物件嘅表面上形成塗層，當可見光或者紫外光照射喺呢啲物質表面嘅時候，光觸媒就可以「儲」起光能，將空氣中嘅氧同埋水份，透過氧化還原反應催化成自由基。依啲自由基通常都係一啲好活躍嘅化合物，可以破壞細胞膜從而令細胞死亡，達到殺菌嘅功能。
咁同「納米」又有咩關係呢？原來當光觸媒分子太大嘅時候就會失去光活性，即係光線刺激唔到「光觸媒」進行化學作用。但太細又會降低吸收光能嘅能力。為咗平衡依兩點而達到殺菌嘅功效，一般光觸媒嘅大小直徑約5-10納米，順理成章佢就叫做「納米觸媒」。
不過「納米觸媒」塗層會隨時間而減低功效，所以都要定期補充先有用架！
創新科學中心
https://ccst.hkfyg.org.hk/
創意科藝工程計劃
https://lead.hkfyg.org.hk/
