大家喺停課/在家工作期間少咗外出社交，心入面有無「朝思暮想嘅人」，有時望下佢張相都會覺得開心呢？
戀愛嘅感覺，既感性又個人化，其實都可以用科學去解釋。戀愛喺科學嘅角度，並唔係同個「心」有關，反而同腦部分泌嘅神經傳導物（Neurotransmitters）有著密不可分嘅關係，其中包括被稱為「快樂激素」，負責大腦嘅情慾，令我哋產生快樂同興奮感覺嘅多巴胺（dopamine） !
曾經有腦部研究人員做咗一項研究，佢哋邀請咗戀愛7個月以上嘅人士接受測試，請佢哋分別睇2組相片：第1組係陌生人、第2組係自己嘅伴侶。發現測試者喺觀看伴侶相片嗰陣，大腦「腹側被蓋區」（Ventral tegmental area）嘅活化程度最大。呢個區域正正就係負責分泌多巴胺，產生「被獎勵」嘅愉悅感，令人更想藉由接近眼前呢個對象去重獲同樣嘅感受。
未談過戀愛嘅你唔係好明？生活上都有類似嘅情況有差唔多嘅效果：例如有時食到好飽，但見到或者聞到好味嘅食物，都係忍唔住一啖又一啖食落肚，其實呢個行為都係因為多巴胺作祟！過去無論談戀愛或者食好野嘅愉悅已經被大腦記住，大腦為咗希望搵返相同嘅快樂，就強逼我哋做返相同嘅動作！
今日係情人節，唔知你搵唔搵到你嘅多巴胺呢？♥
創新科學中心
https://ccst.hkfyg.org.hk/
創意科藝工程計劃
https://lead.hkfyg.org.hk/
