想一個人講真話，首先要搵方法入侵佢嘅腦袋🧠，令佢不自控咁講嘢。所以「吐真劑」必須能夠穿透血腦屏障 (Blood brain barrier, BBB)與腦細胞嘅受體 (receptor) 結合，從而影響人嘅意識。腦部血管被唔同細胞包裹住，最內層嘅內皮細胞 (endothelial cell)就係有屏障功能，阻礙病原體、毒素等穿過血管傷害腦部🚫。之後就同大家介紹下兩款疑似嘅「吐真劑」。
東莨(粵:晾)菪(粵:蕩) (Scopolamine) 鹼用於暈浪止嘔😵💫，1920年代婦產科醫生Robert House發現將東莨菪鹼運合其他藥使用後，病人處於睡夢惺忪狀態，但仍然可以回答問題同憶述事情。有以上效果因為東莨菪鹼係脂溶性可以穿過親脂性 (lipophilic)嘅BBB，之後連結上特定受體，減少神經遞質 (neurotransmitter)釋出，今腦細胞之間嘅「溝通」差咗，作出有意識嘅反應就會差咗，所以有機會答非所問…….🥴
巴比妥酸類藥物 (Barbiturates)有治療失眠、鎮靜等作用。冷戰時期美國審問人嘅時候有機會用到🪖。同樣地巴比妥酸類藥物都係脂溶性，所以都可以穿過BBB。呢款類藥物會連結位於腦細胞之間嘅突觸 (synape) 中嘅瑪氨基丁酸受體 (GABA receptor)，連結後會有通道打開🕳️，帶負電子嘅氯 (chloride)會進入腦細胞，增加嘅負電子會減慢神經脈衝而導致反應緩慢，神智不清，仲有機會整暈咗個人㖭。
所以，上述嘅「吐真劑」都只係一啲減慢神經系統運作嘅鎮抑劑，令一個人神智不清，唔清楚自己講真定講假。加上呢類藥物會有其他副作用，例如幻覺、視力模糊等。所以，考慮到佢嘅實用性同道德觀，喺一般審問疑犯時都好少會用到依啲所謂嘅「吐真劑」。
#Science
#Technology
#Engineering
#Mathematics
