想知道飲品中落咗幾多糖？

#探索科學系列│想知道飲品中落咗幾多糖？│度折射率啦

要量度液體入面糖嘅含量，我哋首先要知道糖加咗入液體之後會影響該液體邊一啲物理特性。以糖水為例，我哋發現糖會影響水嘅折射率，加入嘅糖愈多，糖水嘅折射率愈大，例如純水嘅折射率係1.3330，含10%蔗糖嘅糖水折射率為1.3478，而含50%蔗糖嘅糖水折射率為1.4201。

要精準量度糖水嘅折射率，我哋可以用阿貝折射儀（Abbe Refractometer）直接量度。阿貝折射儀係由德國物理學家恩斯特‧阿貝（Ernst Karl Abbe）於19世紀末發明，主要作用係量度透明液體嘅折射率，從而了解液體中某一隻物質嘅濃度。用糖水嚟做例子，我哋可以用折射儀先量度唔同已知濃度糖水嘅折射率，搵出糖水濃度與折射率之間嘅關係，然後量度樣本，咁我哋就知道樣本入面糖嘅濃度！係一個非常快嘅方法搵出液體中糖含量嘅方法。

不過，使用呢個方法去量度糖濃度有好多限制：首先液體需要係接近透明，如果太過深色嘅液體就未必適合；而且我哋要確保液體入面唔會有其他可影響折射率嘅物質，否則有兩種物質互相影響測試結果，大大降低測試結果嘅準確度。